މަހަކު 85،000 ރުފިޔާ ލިބޭ މެންބަރުންގެ މުސާރަ ކުޑަކުރަން ޕެޓިޝަނެއް ފަށައިފިއެވެ. މި ޕެޓިޝަނަކީ އޮންލައިންކޮށް ސޮއިކުރެވޭ ގޮތަށް ހަމަޖެހިފައިވާ ޕެޓިޝަނެކެވެ.
ޕެޓިޝަންގައި ބުނެފައިވާ ގޮތުން، މަޖިލިސް މެންބަރުންނަށް ދެވޭ ބޮޑެތި މުސާރައާއި އިނާޔަތްތަކަކީ މިހާރު ރާއްޖޭގެ އިގުތިސާދީ ހާލަތަށް އޮތް ބޮޑު ގޮންޖެހުމެކެވެ. އެހެންކަމުން، އިގުތިސާދަށް އޮތް މި ގޮންޖެހުން ކުޑަކުރުމަށްޓަކައި މެންބަރުންގެ މުސާރައާއި އިނާޔަތްތައް ކުޑަކުރުމަށް ޕެޓިޝަންގައި ގޮވާލައިފައިވެއެވެ.
މީގެ އިތުރުން، ޕެޓިޝަންގައި މަޖިލިސް މެންބަރުންނަށް ދޭ ކޮމެޓީ އެލަވަންސް އެއްކޮށް ކަނޑާލުމަށާއި، މެންބަރުންނަށް ލިބޭ ޕްރިމިއަމް ހެލްތު އިންޝުއަރެންސް ކަނޑާލައި އާންމު ރައްޔިތުންނެކޭ އެއްހަމައަކުން އާސަންދައިގެ ހިދުމަތް ދިނުމަށްވެސް ގޮވާލައިފައިވެއެވެ. އަދި ކުރީގެ މަޖިލިސް މެންބަރުންނަށް ދެމުންގެންދާ އިނާޔަތްތައްވެސް ހުއްޓާލުމަށް ޕެޓިޝަންގައި ބުނެފައިވެއެވެ.
ޕެޓިޝަންގައި ފާހަގަކޮށްފައިވާ ގޮތުގައި މަޖިލިސް މެންބަރުން ކުރާ މަސައްކަތްތަކާއި އެ ބޭފުޅުންނަށް ލިބޭ އާމްދަނީ ނުބައްދަލުކަމަށާއި، އިގުތިސާދަށް ދަތި މި ދަނޑިވަޅުގައި މިއީ ތަފާތުކުރުން ބޮޑު، ބޭއިންސާފެއް ކަމަށެވެ. ނަމަވެސް މުސާރަ ކުޑަކުރުމަށް މަޖިލީހުގެ ކުރިއަށްދިޔަ ބަހުސެއްގައި ބައެއް މެންބަރުން ބުނެފައިވަނީ، މެންބަރުންނަށް ދޭ މުސާރަ އަދިވެސް ކުޑަ ކަމަށެވެ.
