ރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަދަދު ނޫހުގެ ސީއީއޯ ހުސައިން ފިޔާޒު މޫސާއަށް ގުޅައި އިންޒާރު ދިން މައްސަލަ އެ ނޫހުން މޯލްޑިވްސް ޕޮލިސް ސަރވިސްއަށް ފޮނުވައިފިއެވެ.
އަދަދު ނޫހުން ހޮނިހިރު ދުވަހުގެ ރޭ ނެރުނު ނޫސް ބަޔާނުގައި ބުނެފައިވާ ގޮތުން، މާޗު 14، 2025 ގެ ރޭ 19:04 ގައި ރައީސް މުއިއްޒު ހުސައިން ފިޔާޒު މޫސާއަށް ގުޅުއްވި ކަމަށާއި، އެމްޑީޕީގެ އެއްވުމެއްގައި އެ ޕާޓީގެ މެންބަރަކު ރައީސްގެ އާއިލާގެ ބޭފުޅަކާ ބެހޭ ގޮތުން ދެއްކި ވާހަކައަކާ ގުޅިގެން ކޯފާވެގެން ވާހަކަ ދެއްކެވި ކަމަށް ވެއެވެ.
“އެޅެން އޮތް އެންމެ ހަރުކަށި ފިޔަވަޅު އަޅާނަން” މިހެން ތަކުރާރުކޮށް ތިން ފަހަރު ބުނުމަށްފަހު ފޯނު ބާއްވާލެއްވި ކަމަށް އެ ނޫހުގެ ބަޔާނުގައި ފާހަގަކޮށްފައިވެއެވެ. އަދަދު ނޫހުން ވަނީ އެ އެއްވުމުގައި ދެކެވުނު ރައީސްގެ އާއިލާއާ ބެހޭ ވާހަކަ ރިޕޯޓު ނުކުރާ ކަމަށް ބުނެފައެވެ. އެ ނޫހުން ފާހަގަކޮށްފައިވާ ގޮތުގައި އެ މައްސަލައާ ގުޅިގެން އެންމެ ފުރަތަމަވެސް ހަބަރު ޝާއިޢުކޮށްފައިވަނީ އެކަން ކުށްވެރިކޮށް ސަރުކާރުގެ އިސްބޭފުޅުން ދެއްކެވި ވާހަކަތަކާ ގުޅިގެންނެވެ.
އަދަދު ނޫހުން ސިފަކޮށްފައިވާ ގޮތުގައި ރައީސް މުއިއްޒުގެ މި ފޯނު ކޯލަކީ ސަރުކާރުން އެދޭ ގޮތަށް އެ ނޫހުގެ ސިޔާސަތުތައް ބައްޓަން ނުކުރާތީ އޮންނަ ހިތްޕުޅު ހަމަނުޖެހުމުގައި ދެއްވި އިންޒާރެކެވެ. އެހެންނަމަވެސް، އެއްވެސް ފަރާތަކުން ދޭ އިންޒާރަކަށް ނުވަތަ ދައްކާ ބިރަކަށް ޖެހިލުން ނުވާނެ ކަމަށް އެ ނޫހުން ބުނެއެވެ.
ގައުމުގެ ރައީސުލްޖުމްހޫރިއްޔާއަކީ ދިވެހިރާއްޖޭގެ އެންމެހައި ފަރުދުންގެ މިނިވަންކަމާއި، ރައްކާތެރިކަމާއި، އަސާސީ ހައްގުތައް ލިބިދެވޭކަން ކަށަވަރުކުރުމުގެ ޒިންމާ އޮތް ފަރާތް ކަމަށް ވާއިރު، މިފަދަ އަމަލެއް ރައީސް ހިންގެވުމުން އެކަމާ މެދު އަދަދު ނޫހުން ވަނީ ކަންބޮޑުވުން ފާޅުކޮށްފައެވެ.
