ރޯދަ މަހުގެ ފަހު ދިހައެއްގައި މާލެ ސަރަހައްދުގެ ޖުމްލަ 34 މިސްކިތެއްގައި ދަމު ނަމާދުކުރުމުގެ އިންތިޒާމު އިސްލާމިކް މިނިސްޓްރީން ހަމަޖައްސައިފިއެވެ. މިއީ މާލޭގެ 21 މިސްކިތަކާއި، ވިލިމާލޭގެ 3 މިސްކިތަކާއި އަދި ހުޅުމާލޭގެ 10 މިސްކިތެކެވެ.
އިސްލާމިކް މިނިސްޓްރީން ބުނީ ހުޅުމާލޭގައި ދަމު ނަމާދުކުރުމަށް ހަމަޖެހިފައިވަނީ ހުޅުމާލޭ ފޭސް އެކެއްގެ 6 މިސްކިތަކާއި، ދެވަނަ ފިޔަވަހީގެ 4 މިސްކިތެއްގައި ކަމަށެވެ. މީގެ ތެރޭގައި މަސްޖިދުއްޝައިހް ގާސިމް ބިން މުހައްމަދު އާލްތާނީ (ވައްގުއްބު މިސްކިތް) ވެސް ހިމެނެއެވެ.
އިސްލާމީ މަރުކަޒުގައި ދަމު ނަމާދުގެ އިމާމަކަށް ހަމަޖެހިފައިވަނީ އައްޝައިހު އަލްހާފިޒު ސަލްމާން މުހައްމަދު ލަޓީފާއި އައްޝައިހު އަލްހާފިޒު ސުލްޓާން މުހައްމަދު ލަޓިފްއެވެ. އަދި ސަލްމާނު މިސްކިތުގައި ދަމުނަމާދު ކުރެއްވުމަށް ހަމަޖެހިފައިވަނީ އަލްހާފިޒް އާދަމް މިޝްއަލް ޝާމިން، އަލްހާފިޒް މުހައްމަދު މިޝްއަލް އާޒިމްގެ އިތުރުން އަލްހާފިޒް އަބްދުﷲ އަހްސަން ސަޢީދުއެވެ.
އިސްލާމިކް މިނިސްޓްރީން ދަމު ނަމާދުގެ އިތުރުން ރޯދަ މަހުގެ ފަހު ދިހައެއްގައި މާލޭގެ 23 މިސްކިތެއްގައި އިޢުތިކާފަށް ތިބުމުގެ އިންތިޒާމުވެސް ހަމަޖައްސާފައިވެއެވެ. އޭގެ ތެރޭގައި ހިމެނެނީ މާލޭގެ 15 މިސްކިތަކާއި ވިލިމާލޭގެ މިސްކިތަކާއި ހުޅުމާލޭގެ 7 މިސްކިތެކެވެ.
ދަމު ނަމާދަކީ އިޝާ ނަމާދަށްފަހު ކިތަންމެ ކުޑަ ހިނދުކޮޅަކުނަމަވެސް ނިދާލުމަށްފަހު ތެދުވެ، ފަތިސްވަގުތުގެ ކުރިން ދެރަކުޢަތުން، ދެރަކުޢަތުން ސަލާމްދެމުން ކުރާ ނަމާދެކެވެ. އަދި އާންމުކޮށް މިސްކިތްތަކުގައި ދަމު ނަމާދުކުރަން ފަށަނީ މެންދަމު 2:00 އިން ފެށިގެންނެވެ.
