އިލެކްޝަންސް ކޮމިޝަނުން ސިޔާސީ ޕާޓީތަކާބެހޭ ޤާނޫނަށް މުހިންމު އިސްލާހުތަކެއް ހުށަހަޅައިފިއެވެ. މި އިސްލާހުތަކުގެ ތެރޭގައި ޕާޓީތަކަށް ދައުލަތުގެ ބަޖެޓުން ފައިސާ ދޫކުރުމުގެ އުސޫލު ބަދަލުކުރުމާއި، ޕާޓީތަކުގެ ކޮންގްރެސް ބޭއްވުމާ ގުޅޭ ކަންކަން ހިމެނެއެވެ.
މި އިސްލާހުތަކުގެ ދަށުން، މިހާރު 10،000 މެންބަރުން ތިބި ޕާޓީތަކަށް އެކަނި ދެމުންދާ ފައިސާ، 3،000 މެންބަރުން ހަމަވާ ޕާޓީތަކަށްވެސް ލިބޭނެ ގޮތް ވަނީ ހުށަހަޅާފައެވެ. މީގެ އިތުރުން، ޕާޓީތަކަށް ދޫކުރާ ފައިސާ ހަތަރު ބަޔަކަށް ބަހާލުމަށް ވަނީ ހުށަހަޅާފައެވެ. އެގޮތުން، ހުރިހާ ޕާޓީތަކަށް 25 އިންސައްތަ، 10،000 މެންބަރުން ހަމަވާ ޕާޓީތަކަށް 25 އިންސައްތަ، މަޖިލިސް އިންތިޚާބުގެ ނަތީޖާއަށް 30 އިންސައްތަ، އަދި ލޯކަލް ކައުންސިލް އިންތިޚާބުގެ ނަތީޖާއަށް 20 އިންސައްތަ ކަނޑައެޅުމަށް ވަނީ ހުށަހަޅާފައެވެ.
ޕާޓީތަކުގެ ކޮންގްރެސްއާ ގުޅޭގޮތުން، މިހާރު ކޮންމެ ފަސް އަހަރަކުން އެއްފަހަރު ބާއްވަން ޖެހޭގޮތަށް އޮތް ޤާނޫނު، އެކަށީގެންވާ ސަބަބަކާ ހުރެ ލަސްކުރެވޭނެ ގޮތަށް ބަދަލުކުރުމަށްވެސް ވަނީ ހުށަހަޅާފައެވެ.
އިލެކްޝަންސް ކޮމިޝަނުން މަޢުލޫމާތު ދެއްވިގޮތުގައި، މި އިސްލާހުތަކަކީ 2019 ވަނަ އަހަރުން ފެށިގެން ސިޔާސީ ޕާޓީތަކާ މަޝްވަރާކޮށްގެން އެއްބަސްވެފައިވާ ކަންކަމެވެ. އަދި މި އިސްލާހުތަކާ ގުޅޭގޮތުން އިތުރަށް މަޝްވަރާކުރުމަށް މިދިޔަ އަންގާރަ ދުވަހު ބައްދަލުވުމެއް ބޭއްވުނު ކަމަށާއި، މި ބައްދަލުވުމުގައި އެމްޑީޕީ، ޖުމްހޫރީ ޕާޓީ، އެމްޑީއޭ އަދި އެމްއެންޕީން ބައިވެރިވެ، އިތުރު ހުށަހެޅުންތައް ހުށަހެޅި ކަމަށް ވިދާޅުވިއެވެ.
މި އިސްލާހުތައް މިހާރު ވަނީ ބަންޑާރަ ނައިބުގެ އޮފީހަށް ފޮނުވާފައެވެ. މި އިސްލާހުތަކުގެ ސަބަބުން ސިޔާސީ ޕާޓީތަކުގެ ހަރަކާތްތަކަށް އިތުރު ހިތްވަރެއް ލިބި، ގިނަ ޕާޓީތަކަކަށް ދައުލަތުގެ އެހީތެރިކަން ލިބޭނެ ކަމަށް ބެލެވެއެވެ.
