މިދިޔަ ރިޔާސީ އިންތިހާބުގެ ތެރޭގައި ކުރި ކެމްޕޭނު ދަތުރުތަކަށް މޯލްޑިވިއަން އެއާރލައިންއަށް ދައްކަންޖެހޭ 5.6 މިލިއަން ރުފިޔާ ނުދައްކާ އޮތުމުގެ ސަބަބުން، ރައީސް އިބްރާހިމް މުހައްމަދު ސޯލިހް ވެރިކަން ކުރައްވާ އެމްޑީޕީ ދަރުވާލައިފި ކަމަށް ވަނީ ރިޕޯޓުކުރެވިފައެވެ. ނިމިދިޔަ އޭޕްރީލް 1 ވަނަ ދުވަހު މޯލްޑިވިއަން އިން ވަނީ އެ މައްސަލަ ސިވިލް ކޯޓަށް ވެސް ހުށަހަޅާފައެވެ.
މޯލްޑިވިއަންގެ މެނޭޖިން ޑިރެކްޓަރ އިބްރާހިމް އިޔާސް ވިދާޅުވީ، މިދިޔަ އަހަރުގެ ސެޕްޓެމްބަރުން ފެށިގެން އޮކްޓޯބަރާ ދެމެދު ކުރި ދަތުރުތަކަށް ވާ 10 އިންވޮއިސްއެއްގެ ފައިސާ ނުދައްކާ އޮތް ކަމަށެވެ. އެ ފައިސާ ދެއްކުމަށް އިތުރު ފުރުސަތުތަކެއްވެސް ދިންކަމަށާއި، ނަމަވެސް ނުދެއްކުމުން ކޯޓަށް ދާން މަޖުބޫރުވީ ކަމުގައި ވެސް އޭނާ ވިދާޅުވިއެވެ.
މިއީ ޕާޓީތަކަށް ދަރަނި ވުމުން ޒިންމާ އުފުލަން ޖެހުމުގެ ފުރަތަމަ މިސާލެއް ނޫނެވެ. ކުރީގެ ރައީސް މައުމޫން އަބްދުލްގައްޔޫމުގެ ވެރިކަމުގައި އޭރު އޭނާ ހުންނެވި ޑީއާރުޕީ އުވާލުމުން، އެ ޕާޓީން އެމްޓީސީސީއަށް ދައްކަން ޖެހޭ ފައިސާ ހޯދަން މައުމޫނާ ދެކޮޅަށް ދައުވާ ކޮށްފައިވެއެވެ. ނަމަވެސް ސިވިލް ކޯޓުން މައުމޫނަށް އެ ދަރަންޏަށް ޒިންމާ ނުކުރުވޭނެ ކަމަށް ނިންމުމުން، އިސްތިއުނާފް ކޮށް ހައި ކޯޓުން މައްސަލަ ބަލައިގަތުމުން އެ މައްސަލަ މިހާރު މައުމޫން ވަނީ ސުޕްރީމް ކޯޓަށް ހުށަހަޅުއްވާފަައެވެ.
ޑީއާރުޕީގެ އެންމެ އިސްވެރިންގެ ހައިސިއްޔަތުން 2008 ވަނަ އަހަރު އެ ޕާޓީގެ ޒައީމްގެ ގޮތުގައި ހުންނެވި މައުމޫނު އެ ޕާޓީގެ ދަރަންޏަށް ޒިންމާވާންޖެހޭ އުސޫލުން އެމްޑީޕީން 2023 ވަނަ އަހަރު ރިޔާސީ އިންތިހާބަށް ނުކުންއިރު އެޕާޓީގެ އެންމެ އިސްވެރިއެއްގެ ގޮތުގައި ހުންނެވި ރައީސް އިބްރާހިމް މުހައްމަދު ސޯލިހުވެސް އެމްޑީޕީގެ ދަރަންޏަށް ޒިމާވާންޖެހޭނެކަމަށް ބުއްދީގެ އުސޫލުތައް ގަބޫލުކުރެއެވެ.
. އެހެންވެ، ޕާޓީއަށް އުފުލަންޖެހޭ ޒިންމާ ފުރިހަމައަށް އަދާ ނުކުރުމުގެ ސަބަބުން އިންތިހާބުގެ ވަގުތުގައި ހޯދި ހިދުމަތްތަކަށް ފައިސާ ދެއްކުމުގައި ޕާޓީ ދަރުވާލިކަން އެނގެއެވެ. ސުޕްރީމް ކޯޓަށް ގޮސް ވެސް ޕާޓީ ދަރުވާލިކަމުން ސަލާމަތް ވެވޭކަށް ނެތެވެ.
، އެމްޑީޕީގެ މިހާރުގެ މާލީ ހާލަތު އެންމެ ރަނގަޅު ނޫން އިރު، ޚަރަދުތަކަށް ހަމަޖައްސަންޖެހޭ ފައިސާގެ ކަންކަން ބެލެހެއްޓުމުގައި ޕާޓީ މަސައްކަތްކުރަން ޖެހިފައިވާކަން ފާހަގަކުރެވެއެވެ. އިންތިހާބަށް ކުރާ ޚަރަދުތައް ނިމުމާއެކު، ދަރަނިތައް ހަމައަށް ދައްކަން ޖެހޭނެއެވެ. ރައީސް ނަޝީދު އެންމްޑީޕީގެ އެންމެ އިސްވެރިއެއްގެ ގޮތުގައި ހުންނެވިއިރު މިފަދަ މައްސަލައެއް ދުވަހަަކުވެސް ފެންމައްޗެއް ނުވެއެވެ.
މިފަދަ މައްސަލަތަކުގައި ސިޔާސީ ޕާޓީތަކުން ޒިންމާ އުފުލުމުގެ ބަދަލުގައި ބޭކާރު މަސައްކަތްތަކެއް ކުރުމުން ލިބޭނީ ރައްޔިތުންގެ ހިތްހަމަނުޖެހުމެވެ. އަދި ޕާޓީގެ ސިޔާސީ ހައިބަތަށް އުނިކަމެއް އަތުވެދާނެއެވެ. ފެންނަން މިއޮތީ އިބްރާހިމް މުހައްމަދު ސޯލިހު އެމްޑީޕީ ދަރުވާލިކަން ކަށަވަރުވުމާއެކު، އެކަމުގެ ޒިންމާ އުފުލަން ޖެހޭނެކަމެވެ.
