ރައްޔިތުންގެ މަޖިލީހުގެ ނައިބު ރައީސް އީވާ އަބްދުالله ގެ އިތުބާރު ނެތްކަމުގެ މައްސަލަ އަންނަ އާދިއްތަ ދުވަހަށް އެޖެންޑާކޮށްފިއެވެ.
އީވާ މަގާމުން ދުރުކުރަން ގަރާރު ހުށަހަޅާފައިވަނީ އެމްޑިޕީގެ 49 މެންބަރުންނާއި އަމިއްލަ މެންބަރެއްކަމަށްވާ މުހައްމަދު ނަޝީދު (މޮސްޓާ) ގެ ސޮޔާއެކު 50 މެންބަރުން ގެ ފަރާތުންނެވެ.
އީވާގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅާފައިވާއިރު, ރައްޔިތުންގެ މަޖިލީހުގެ ރައީސްކަމުގެ މަގާމުން, ރައީސް މުހައްމަދު ނަޝީދު ވެސް ވަނީ މި މަހުގެ 13 ވަނަ ވަނަ ދުވަހު އިސްތިއުފާ ދެއްވާފައެވެ.
އެމްޑީޕީން ރައީސް ނަޝީދާއި އީވާގެ އިތުބާރު ނެތްކަމުގެ މައްސަލަ ހުށަހަޅާފައިވަނީ އެ ދެ ބޭފުޅުން އެމްޑީޕީ ދޫކުރައްވައި ދަ ޑިމޮކްރެޓްސް އާއި ގުޅިވަޑައިގެން ފަހުންނެވެ. ރައީސް ނަޝީދާއި އީވާ މަޖިލީހުގެ ރައީސް އަދި ނައިބު ރައީސްގެ މަގާމަށް ވަޑައިގެންނެވީ އެމްޑީޕީ މެންބަރުންގެ ގޮތުގައި ތިއްބެވުމަށްފަހުއެވެ.
ރައްޔިތުންގެ މަޖިލީހުގެ ރައީސްކަމުގެ މަގާމު މިހާރު އަދާކުރައްވަނީ އެމްޑީޕީގެ ޕާލިމެންޓަރީ ގުރޫޕުގެ ލީޑަރު މުހައްމަދު އަސްލަމްއެވެ.
