ރައްޔިތުންގެ މަޖިލީހުގެ ރައީސް ކަމުގެ މަގާމުން އިސްތިއުފާ ދެއްވީ މަޖިލީހުގެ މެޖޯރިޓީ ޕާޓީ އެމްޑީޕީ އިން އެ މަޖިލީހަށް ދޭ ގެއްލުން ބޮޑުވެދާނެތީކަމަށް ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މަޖިލީހަށް ފޮނުއްވި ސިޓީގައި ވިދާޅުވެފައިވަނީ, މަޖިލީހުގެ އަގުލަބިއްޔަތު އޮތް އެމްޑީޕީން ގެންދަނީ ޑިމޮކްރަސީގެ އަސާސުތަކަށް ނުރައްކާވާފަދަ އަމަލުތަކެއް ހިންގަމުންނެވެ.
“އިތުބާރު ނެތްކަމުގެ މައްސަލަ ހުށަހެޅުއްމަށްފަހުގަ އެމްޑީޕީންގެންދަނީ މަޖިލީހުގެ ބާރުތައް އަބަދުގެ އަބަދަށް ހަނިވެގެންދާނެ އެންމެހާ އަމަލުތައް ހިންގަމުން, ރައީސް ނަޝީދު ވިދާޅުވިއެވެ.”
ރައީސް ނަޝީދު ސިޓީފުޅުގައި ވިދާޅުވެފައިވަނީ އެމްޑީޕީން ފަނޑިޔާރުގެއަށް ގޮސް މަޖިލީހުގެ މެންބަރުންނަށް ކަނޑައެޅިގެން ލިބިދީފައިވާ ބާރެއް ހަނިކޮށްފައިވާކަމަށެވެ.
ސުޕްރީމް ކޯޓުގެ ހުމުގައި އެ މައްސަލައިގެ ބިރުވެރިކަން ކިޔައިދީފައިވާކަމަށާއި, ނަމަވެސް އެ ކޯޓުގެ ވެސް “ބަހާއި އަމަލާއި ދިމާނުވާތީ” ހިތާމަކުރައްވާކަމަށް ނަޝީދު ވަނީ ވިދާޅުވެފައެވެ.
“މަޖިލީހުގެ ރައީސްކަމުގައި އަޅުގަނޑު އިތުރަށް ހުރެއްޖެނަމަ މަޖިލީހުގެ މެޖޯރިޓީ ޕާޓީން މަޖިލީހަށް ދޭ ގެއްލުން ދާނީ ބޮޑުވަމުން,” ރައީސް ނަޝީދު އިސްތުއުފާ ދެއްވަމުން ވިދާޅުވެފައިވެއެވެ.
ރައީސް ނަޝީދު މިއަދުމަޖިލީހުގެ ރައީސްކަމުން އިސްތިއުފާ ދެއްވިއިރު, އެމްޑީޕީން ދެ ފަހަރެއްގެ މަތިން ނަޝީދުގެ އިތުބާރުނެތްކަމުގެ ގަރާރު ވަނީ ހުށަހަޅައިފައެވެ.